Galicia participa por primeira vez en Miami na convención ASTA de axencias de viaxe americanas formando a máis de 150 axentes

Galicia participa este ano por primeira vez na Convención Global ASTA organizada pola Asociación de Axencias de Viaxes Americanas que se está a celebrar esta semana na cidade de Miami con máis de 1.200 participantes e onde persoal da Xunta e membros do sector turístico galego impartiron un curso de capacitación sobre o destino Galicia a máis de 150 axentes.

Ademais, a directora de Turismo, Nava Castro, tamén asiste a esta convención na que Galicia conta cun expositor compartido con Turespaña para encontros de traballo e citas profesionais e onde se promove o destino galego para reforzar os lazos turísticos entre ambos destinos de cara ás oportunidades do Xacobeo 2021. Por parte do sector, o Clúster Turismo de Galicia conta neste evento cos turoperadores Rutas Meigas, Pilgrim, Galiwonders, SimplyTravel Galicia, Interrías e Eatour Specialist.

Mercado que medra un 20%

A presenza de Galicia neste evento enmárcase na estratexia turística do Goberno galego por reforzar a presenza internacional e achegar tamén o Ano Santo 2021 a mercados de crecente interese como está a demostrar ser o estadounidense.

É xa o terceiro mercado internacional do que proveñen máis viaxeiros, por detrás de Portugal e Alemaña. O ano pasado máis de 110.000 turistas estadounidenses escolleron Galicia e no que vai de ano a demanda turística de EEUU está a medrar a un ritmo do 20%. O mesmo sucede no eido do Camiño de Santiago, onde tamén é o terceiro país estranxeiro do que proveñen máis peregrinos.