O Xacobeo patrocina o Festival de Pardiñas 2010

A Sociedade Anónima de Xestión do Plan Xacobeo patrocina a XXXI edición do Festival de Pardiñas, que terá lugar na localidade lucense de Guitiriz os vindeiros días 7 e 8 de agosto. Así o confirmou o xefe territorial de Cultura e Turismo, Xosé Carlos Rodríguez Andina, no acto de presentación do evento.

O Festival de Pardiñas, que se vén celebrando anualmente dende 1980, é un dos festivais de referencia do verán galego e está considerado unha Festa de Interese Turístico Galego. “Pardiñas é unha cita moi arraigada, unha tradición importante con proxección en toda Galicia”, asegurou o xefe territorial de Cultura.

O coordinador da asociación cultural Xermolos e responsable da organización do festival, Alfonso Blanco, mostrouse moi satisfeito por contar co patrocinio do Xacobeo e agradeceu o apoio “non só económico, tamén cultural” da Xunta de Galicia. “Estar no Camiño norte –afirmou- é fundamental para nós”.

O programa desta XXXI edición da Feira e Festa da Música e da Arte de Pardiñas inclúe pintura, escultura, literatura, fotografía e, sobre todo, música. Dez artistas e grupos –a maior parte galegos, pero tamén chegados de Madrid, Alemaña e Irlanda- conforman un cartel que, en palabras de Alfonso Blanco, “reflexa á perfección espírito de Pardiñas: animar a cantar, a bailar, a facer troula”. Así, entre os músicos encargados da animación nocturna do festival, destacan o gaiteiro Xosé Manuel Budiño e as formacións Bellón Maceiras Quinteto, Canteca de Macao e Galegoz.

Actividades para todas e todos

Ademais, aqueles que se acheguen a Guitiriz os vindeiros días 7 e 8 de agosto poderán visitar a XVII Mostra de artesáns de instrumentos de música tradicional e a XXXI Mostra de Artesanía, que inclúe mostras de pintura, cerámica, escultura e fotografía.

Nesta edición, que, segundo cálculos da organización, atraerá a uns 20.000 visitantes, tamén haberá espazo para a literatura. Así, a tarde do domingo 8 iniciarase co pregón do sociólogo Bernardo García Cendán e contará coa participación dos escritores Xosé Neira Vilas e Marica Campo, entre outros. Eles serán os encargados de entregar os premios do certame infantil de poesía, contos e debuxo no que, este ano, participaron máis de 900 nenos e nenas duns 40 colexios galegos.

Neste sentido, Alfonso Blanco destacou o labor dos máis novos e asegurou que o festival de Pardiñas “mantense xeración a xeración, levado adiante pola xente moza”. O coordinador da asociación Xermolos xustificou deste xeito o esforzo económico que se fixo este ano para poñer en marcha o festival. “Aínda que custe cartos – afirmou- produce ledicia, ánimo, festa e unión para tirar adiante”.

O patrocinio do Xacobeo é, como apuntou Blanco na presentación do festival, “fundamental para facer un festival activo, participativo, como queremos que sexa Pardiñas”.