PuntoGal organiza durante o Culturgal un concurso sobre banda deseñada con Kiko da Silva

O stand de PuntoGal na edición deste ano da feira é o número 63, lugar onde se ofrecerá información sobre o dominio. As persoas que se acheguen por alí poderán conseguir agasallos do dominio e de Gadis, que colabora unha vez máis coa asociación neste evento cultural.

PuntoGal e o debuxante de banda deseñada Kiko da Silva organiza un concurso para pequenos e grandes durante a feira. O ilustrador preparou unha historia na que faltan os diálogos, protagonizada pola súa personaxe Mario O bolseiro. Aqueles que desexen participar poden recoller no stand do dominio, ou descargar da súa páxina web, a historia ideada por da Silva, completar as cinco escenas, cubrir os seus datos e entregala no stand ou enviala por correo electrónico a info@dominio.gal. As bases poderán consultarse en www.asociacion.gal.

Entre todos os participantes PuntoGal sorteará, en colaboración con Gadis, unha tablet e unha smart box. Ademais, Kiko da Silva e o dominio elixirán a mellor historia, que recibirá outra tablet, un lector Kindle, unha smart box e o seguinte lote de publicacións: O inferno do debuxante, Que contan as ovellas para durmir, Cando Martiño tivo ganas de mexar na Noite de Reis e Moncho e mancha. Igualmente, a escola de banda deseñada O Garaxe Hermético aporta un lote de tres álbumes creados polos seus alumnos, que formará parte do segundo premio. Finalmente, haberá un premio especial para menores de idade. O periodo de participación no concurso empeza coa inauguración da feira e remata o domingo, día 2 de decembro, ás 20:00 horas. Os gañadores faranse públicos nos seguintes días.

Kiko da Silva estará no stand de PuntoGal o venres, día 30 de novembro, ás 18:30 horas. O autor é fundador da mencionada primeira escola profesional de banda deseñada e de ilustración de Galicia, O Garaxe Hermético, onde traballa como mestre. Igualmente, dirixe a revista Retranca, colabora con diversas publicacións e é autor da serie Fiz nos biosbardos ou de O inferno do debuxante, obra coa que gañou o premio Castelao no ano 2014.

Firefox en galego

Durante a feira, PuntoGal presentará tamén a súa nova liña de colaboración en proxectos de localización de software en galego e de ferramentas TIC útiles para a comunidade. Neste caso, fíxose un proxecto piloto para patrocinar a tradución e mellorar as ferramentas do navegador Firefox. En colaboración co coordinador das traducións ao galego en Mozilla, Enrique Estévez, e co Proxecto Trasno, que agrupa aos tradutores ao galego de proxectos de software libre, PuntoGal propiciou a posta ao día completa da última versión do navegador (v65), tradución que manteñen voluntarios da comunidade, para que poida ser utilizada en galego.

Deste xeito, recuperouse o 100% da interface incluíndo parte das súas funcionalidades que nunca fora posible ter adaptadas aos galegofalantes, obtívose unha memoria de tradución que será reutilizable publicamente, traduciuse o instalador para o sistema operativo Microsoft Windows, as páxinas informativas desta versión e a integración do corrector ortográfico de galego tamén na súa última versión (a 18.04). A presentación desta iniciativa terá lugar no Espazo Foro de Culturgal o sábado, día 1 de decembro, ás 13:30 horas.
Nos vindeiros meses, o dominio activará novos proxectos destas características en colaboración con persoas e entidades vinculadas á rede en Galicia. Anteriormente, o dominio xa puxo en marcha un acurtador (i.gal) e un sistema de envío de arquivos (velaquí.gal) en colaboración coa dinahosting.
PuntoGal alcanzou esta mesma semana ós 4.900 dominios rexistrados. O aumento dos últimos días débese en parte á campaña lanzada con motivo da Mobile Week.