Inícianse no CIFP Compostela as catas oficiais dos queixos e meles de Galicia con 93 mostras de 56 industrias

A Consellería do Medio Rural, a través da Axencia Galega da Calidade Alimentaria (Agacal), e os cinco consellos reguladores (entre os dos queixos e o do mel) son os organismos encargados de convocar un novo certame das Catas Oficiais dos Queixos e Meles de Galicia, co fin de premiar o saber facer e a dedicación dos profesionais galegos destes dous sectores produtivos e deixar patente a excelente calidade dos queixos e meles autóctonos.

Así, as catas darán comezo mañá, mércores, no Centro Integrado de Formación Profesional Compostela, sito en Lamas de Abade. Ese día arrancará a XVIII Cata dos Meles de Galicia, mentres que os días 28 e 29 destinaranse á XXII Cata dos Queixos de Galicia. Un labor que levará a cabo un panel de sete expertos, no caso dos meles, e doce no dos queixos, encargados de analizar totalmente a cegas e de forma minuciosa as mostras, para pasar a seleccionar as marcas gañadoras. Todos eles son profesionais experimentados vencellados ao ámbito da gastronomía, hostalería, comunicación e ao sector agroalimentario.

Nesta edición das catas rexistráronse un total de 36 industrias queixeiras pertencentes ás catro denominacións de orixe galegas —DOP Queixo Tetilla, DOP Arzúa-Ulloa, DOP San Simón da Costa e DOP Cebreiro— e 20 industrias do mel acollidas á Indicación Xeográfica Protexida Mel de Galicia. Os técnicos da Agacal, en colaboración cos consellos reguladores, recolleron a semana pasada un total de 93 mostras participantes, avalando en todo momento o anonimato das marcas participantes.

Mostras presentadas

No proceso de recollida, os queixos e meles participantes identifícanse cun número de mostra que, posteriormente, se mudará por outro antes de proceder á cata, garantindo así de maneira fidedigna o anonimato das mostras en todo momento. As caixas que conteñen os queixos e os meles non portan ningunha marca que permita ser identificada e permanecen precintadas e custodiadas ata o momento da cata.

No tocante aos meles, participan 20 industrias que inscribiron 14 meles para concursar na categoría “A” de Meles Monoflorais e 18 para a categoría “B”, correspondente a Meles Multiflorais. No caso dos queixos, son 36 as industrias queixeiras a concursar, cun número de mostras que se distribúen da seguinte forma: 26 queixos inscritos da DOP Queixo Tetilla; 18 queixos na categoría DOP Arzúa-Ulloa e 6 queixos que compiten como Arzúa-Ulloa curado; 9 pertencentes á DOP San Simón da Costa e 2 queixerías na categoría de queixo fresco da DOP Cebreiro.

Un esixente panel de cata

O panel da XXII Cata dos Queixos contará coa presenza de cinco membros do panel de cata de Medio Rural, aos que se sumarán nomes coma o de Iria Espinosa, xefa de cociña do laureado Árbore da Veira, galardoado cunha Estrella Michelin. Tamén estará Isabel Marcos, responsable técnica e de calidade no Consello Regulador da DOP Cabrales e Artur Yuste i Tarragó, director xeral do Grupo Cuevas, unha das maiores plataformas loxísticas de distribución alimentaria desde 1867. Entre os persoeiros máis mediáticos, súmanse a química coruñesa e divulgadora científica, protagonista de Órbita Laika —La 2 de TVE—, Deborah García; e unha das caras máis coñecidas da Televisión de Galicia, o presentador de Larpeiros, Adrián Díaz. Sen saír da CRTVG, tamén participará Anxo Vázquez Pernas, director dos primeiros programas televisivos especializados en información agraria da Labranza e do Agro. Por último, catará tamén Francisco J. Fernández Eiros, experto en análise sensorial de produtos lácteos e membro do panel de cata da APLTA.

No que respecta á XVIII Cata dos Meles, ademais dos catro membros do panel de cata da IXP Mel de Galicia, incorpóranse tres profesionais máis. Dunha banda, o xornalista e profesor universitario, Manuel Gago, coñecido tamén por ser o director do portal de divulgación do Consello da Cultura Galega e editor do blog Capítulo 0. As súas publicacións convertérono en todo un referente no ámbito da divulgación histórica, gastronómica e cultural. Acompañarao Ana Pascual Maté, coordinadora académica do Grao de Nutrición Humana e Dietética da Universidade Isabel I de Burgos e membro do grupo de análise sensorial da IHC —International Honey Commission—. Por último, tamén participará a televisiva Teresa Abalde, fotógrafa e interiorista máis coñecida por acadar a segunda posición no talent show culinario MasterChef.