Ibuprofeno Teatro estrea no Teatro Principal de Compostela 'O mel non caduca'

É unha obra para emocionar e concienciar e tamén para rir e emocionar, 'hai moita ironía e moito humor no espectáculo, un humor reflexivo e crítico, por veces surrealista e moi relacionado co universo do clown. Rimos principalmente de nós mesmos e cuestionámonos como puidemos, como sociedade, ter chegado ata aquí', afirma Cortegoso.

A montaxe amósanos dúas tramas: dous científicos que en 2173 tratan de crear sinteticamente unha abella a partir do último tarro de mel que se conserva e dous irmáns que se reencontran trala morte da súa nai para xestionar as pertenzas familiares. As dúas tramas compleméntanse con outros textos e con escenas de movemento escénico, nun espazo creado a partir do universo das abellas e composto por colmeas e outro material de apicultura.

Carmela Bueno no movemento escénico e na axudantía de dirección, Diego Seixo no espazo escénico, Davide González no espazo sonoro e Salvador del Río no deseño de iluminación completan o equipo. O resultado é unha mestura de claves, un espectáculo moi aberto que toma elementos do drama, da comedia, do clown, da instalación, do texto contemporáneo, que vai saltando do máis poético ao máis cru, do real ao onírico.

Integrar a escrita no propio proceso creativo

As ideas que deron lugar a 'O mel non caduca' xurdiron a raíz de varios Obradoiros de Creación Escénica que Marián Bañobre e Santiago Cortegoso impartiron en diferentes cidades e festivais, desde o 2013, arredor do tema da obsolescencia programada e do abandono dos espazos. Con esta proposta e despois de dúas montaxes a partir dun texto xa escrito ('Raclette' e 'Casa O'Rei') a compañía retoma os procesos de creación colectiva, que integran a escrita dentro do propio proceso de ensaios do espectáculo.

Tras case 10 meses de traballo nos que se lle deu moita importancia á fase de documentación previa ás improvisacións co equipo, Ibuprofeno Teatro estrea a súa sétima montaxe coincidindo cos 10 anos de vida da compañía. Ademais de en Compostela nos vindeiros
meses 'O mel non caduca' poderá verse en Ourense, Boiro, Vigo, Cangas, A Coruña e Narón.