O italiano Ángelo Néstore e o noiés Ismael Ramos reescriben a familia e a masculinidade en poetas di(n)versos

Se o segundo escribe en galego, o primeiro faino en castelán e, de feito, ambos constitúen hoxe nomes imprescindibles para a nova poesía galega e española respectivamente, dende poéticas transformadoras e dunha incuestionable calidade literaria.

Residentes en Noia e en Málaga, Ramos (1994) e Néstore (1986) veñen nas súas obras deconstruíndo o concepto de familia así como do rol masculino dentro dela, achegando perspectivas de enorme diversidade sexo/xénero aos imaxinarios literarios galego e español. Recoñecidos pola crítica dende moi noviños, o galego foi o pasado ano Premio Javier Morote outorgado polas librarías independentes españolas (CEGAL) ao mellor libro publicado por un autor/a novo/a, que se sumou ou ao seu anterior Premio Johan Carballeira de Poesía. O nacido no sur de Italia foi recoñecido en 2018 co Premio Ocaña á súa traxectoria poética no XXI Festival Internacional de Cine LGBT de Extremadura, ademais de ter levado o Emilio Prados ou o Hiperión de Poesía.

Se o noiés ten sido editor, libreiro e responsable de comunicación no eido cultural, o malagueño, que entende a poesía como un territorio queer onde a poesía se hibrida con outras disciplinas como a performance, a música, as artes escénicas ou a narrativa, actualmente co-dirixe o Festival Internacional de Poesía de Málaga Irreconciliables, é director editorial da editorial de poesía Letraversal e profesor no Departamento de Tradución e Interpretación da Universidade de Málaga.

Amos os dous autores estarán ao dispor do público para asinar os exemplares que dos seus títulos achegue unha libraría de proximidade.

POETAS DI(N)VERSOS, Premio da Crítica Galicia á Mellor Iniciativa Cultural e fundado e coordinado por Yolanda Castaño, continuará reunindo mes a mes o mellor da poesía de Galicia e de fóra dela en novas citais presenciais igual de abertas e gratuítas, ata o fin do curso lectivo, e convocará na sesión do 14 de decembro ao autor en asturiano Xuan Bello e á bueuense Miriam Ferradáns.