Conclusións do curso de xogos tradicionais

Á vista está que existen vários frentes na Galiza traballando no eido isoladamente. Entre elas, atopamos iniciativas que levan realizando-se muitos anos e outras que ven de nacer recentemente. Entre outras muitas iniciativas, pensamos na Liga de Birlos do Val Miñor, na Liga da Chave de Ourense, na Regata das Dornas de Arousa, na Liga de Birlos ao Canteiro de Riotorto, en distintos museos escolares (Esteiro, A Capela...), várias publicacións ao respeito, a existencia do Palao e numerosas asociacións e centros de ensino que traballan habitualmente arredor dos xogos tradicionais. Porén, tambén observamos casos tan curiosos como que a Asociación da Chave (xogo galego de fonda raigame), para poder desenvolver a súa Liga, teña que estar federada na Federación de Petanca (xogo importado da Franza há apenas un século).
Do mesmo xeito, constatamos que ao longo das 3 últimas décadas o xogo tradicional (agás algunhas excepcións) perdeu presenza nomeadamente entre a mocidade, centrando-se a súa prática entre os vellos, ou ben en programas culturais que os protexen.
Por isto consideramos necesária a creación dunha entidade (Coordenadora, Foro...) que agrupe a todas estas manifestacións que, arredor dos xogos tradicionais, existen na Galiza.
Para isto, acordou-se fazer unha nova convocatória: unha reunión á que se agarda asistan representantes dos distintos colectivos galegos que traballan neste eido. A xuntanza está prevista para o vindeiro 26 de xuño e o lugar elexido nesta ocasión será Melide.
A convocatória para este acto fará-se –nomeadamente- desde o que xá se acolleu como o portal da tradición lúdica galega www.xogospopulares.com, nacido co gallo deste evento.