A Asociación de Gaiteiros Galegos coordina as actividades de música tradicional de Vai de Camiño

Un total de cinco grupos, pertencentes á Asociación de Gaiteiros Galegos, protagonizan pasarrúas e mostras de música tradicional en 3 concellos da comarca de A Ulloa. O sábado 12 de xullo están en Arzúa os grupos de música tradicional Millo Verde (A Coruña) e Castelo de Melide (Melide), os pasarrúas destes dous grupo serán a partir das 11:30 horas pola vila arzuana. O domingo, día 13, a vila de Palas de Rei acolle a actuación de A Requinta Laxeira (Vedra, A Coruña).

A Asociación de Gaiteiros Galegos colabora, por terceiro ano consecutivo, coa S. A. de Xestión Plan Xacobeo na organización das actividades do programa Vai de Camiño. A Asociación de Gaiteiros Galegos é a encargada do asesoramento e coordinación das actuacións de música tradicional que se efectúan dentro deste programa. Segundo o presidente da AGG, Santiago Caneiro Aneiros, “dende a Asociación de Gaiteiros Galegos levamos anos traballando pola dignificación e normalización da nosa música e entendemos que a participación de grupos e solistas nas programacións que se realizan dende as administracións públicas é un xeito de achegar a música tradicional, en condicións dignas, ás vilas e cidades do país”.

A AGG conta neste momento con máis de 600 asociados e asociadas distribuídas por todas as comarcas galegas e na Galiza exterior. A través dos seus asociados a AGG ten presenza na maior parte das asociacións e colectivos culturais que desenvolven actividades en torno á música tradicional no país. A AGG é a entidade asociativa máis representativa e con maior peso específico no tocante á música tradicional en Galiza..

UNHA ASOCIACIÓN CREADA PARA DEFENDER A DIGNIDADE DA MÚSICA TRADICIONAL

A comezos da década dos 70 tiveron lugar en Ortigueira as primeiras xuntanzas de gaiteiros e artesáns coa común preocupación de unificar criterios deste gremio de profesionais. Pero foi o 28 de maio de 1988 cando Antonio X. Castro, Xosé Vicente Ferreirós (membro de Milladoiro), Xosé Fernández Costas, Xosé Álvarez Marías, Ricardo Santos, Xosé Domingos Fuciños, Xoan Dominguez Silvar, Xoán Xosé Fernández forman a primeira Xunta Xestora na que actuaría como presidente provisorio o finado e emblemático gaiteiro de Viascón Ricardo Portela.

As primeiras actuacións desta primeira xunta xestora foron dirixidas a estructurar o que hoxe é a AGG. Creáronse vocalías nas vilas e cidades galegas e comezouse unha campaña de implantación que acadou uns cento cincuenta socios entre gaiteiros, percusionistas, artesáns, musicólogos, investigadores e xente en xeral vinculada ao mundo da cultura galega. Así votaba a andar a única asociación de músicos tradicionais con implantación en todo o país galego.