Alcobendas (Madrid) acolle a XV Semana-Xuntanza Gastronómica do Marisco

Dende o venres 23 ata as 22:00 do domingo dous de maio, os residentes na comunidade de Marid -e lindantes- e que ademais sexan amantes do marisco e dos produtos galegos, teñen unha cita ineludible no recinto Ferial de Alcobendas. A Casa de Galicia en Madrid acolleu hoxe a presentación da décimo quinta edición cuxo programa incorpora importantes novidades.

No acto de presentación interviñeron o delegado da Xunta en Madrid, José Ramón Ónega, o tenente alcalde de Alcobendas, Ramón Cubián -en representación do alcalde Ignacio García de Vinuesa, por encontrarse este en Nova York-; o presidente de Xuntanza de Galegos en Alcobendas, Ovidio Cadenas e o director comercial de Gastrónomo Star la Toja, Javier Prieto.

"Deus bendiciu a Galicia coas Rias Baixas, que son a fonte do marisco. Se Alcobendas tivese unha ría sería o centro do mundo, pero ten a Semana do Marisco de Galicia, que non é pouco", dixo o delegado da Xunta, e sinalou como "os galegos non concibimos o mundo sen un bo xantar e se ademais no menú está presente o marisco... non só é felicidade, é o paraiso! ".

Tamén valorou o gran traballo que realiza Ovidio Cadenas coa comunidade galega de Alcobendas "facendo honra ao seu apelido, unindo, elo a elo sen descanso nun gran labor,".

Pola súa banda, Ovidio, tras os agradecimentos de rigor, invitou a todos os asistentes, especialmente aos medios de comunicación, a difundir a cita gastronómica, "que se cumpre 15 anos, debe ser por algún motivo, e en cada nova edición intentamos que saia mellor".

O tenente de alcalde, Cubián, recordou que Alcobendas é un municipio "feito con anaquiños de toda España e que sen dúbida a comunidade galega é unha das máis activas e importantes".

Para Javier Prieto, "este ano, ademais dos mellores produtos, queremos que interveñan outros sentidos e por iso temos previsto ambientar o recinto con tradicións típicas galegas como as alfombras florais ou unha romaxe popular".

A presentación rematou coa proxección dunhas fermosas imaxes de paisaxes e produtos galegos., á que seguiu unha degustación na que se serviron unha selección dos máis típicos.