Jesús Gamallo dirixe a reunión de lanzamento da Rede Europea de Agrupacións de Cooperación Territorial en Bruxelas

En aplicación do ditame sobre as AECT tense creado esta rede de AECT da que formarán parte representantes políticos e técnicos do ámbito europeo.

Gamallo, que moderou a primeira mesa redonda do encontro, destacou os elementos principais do ditame do Comité das Rexións sobre a revisión do Regulamento das AECT do que foi relator o Presidente da Xunta de Galicia. Así, destacou a idoneidade desta nova figura xurídica para canalizar programas ou proxectos de cooperación territorial e que servirá para unha mellor adaptación de cara ás necesidades que poidan aparecer neste ámbito a partires de 2014, cando se inicie o novo período de programación financeira na UE.

O director xeral incidiu na importancia do valor engadido que debe aportar o Comité das Rexións no desenvolvemento das AECT. Referiuse en concreto, á posta en marcha desta Plataforma de seguimiento das AECT que levará a cabo unha avaliación permanente do desenvolvemento desta normativa e da súa implantación práctica, facilitando o intercambio de experiencias e unha maior visibilidade deste instrumento de cooperación. Para Gamallo “esta Plataforma será un órgano chave na tarefa de apoio e asesoramento das AECT.”

Dende a óptica galega o director xeral destacou o papel activo que as AECT deben ter no desenvolvemento dunha cooperación territorial máis dinámica, centrada na busca de solucións innovadoras, na optimización dos recursos e no aumento da eficiencia na xestión. A xuízo de Gamallo “todas as autoridades rexionais e locais deberían chegar a coñecer as vantaxes da cooperación territorial institucionalizada”.

Neste acto de lanzamento da plataforma das AECT tomaron tamén parte, entre outras autoridades, a presidenta do Comité das Rexións europeo, o presidente da comisión de cooperación territorial deste organismo europeo e o Ministro de Estado húngaro de Xustiza e Administracións públicas.