Gala de San Eloi, Patrón dos Xoieiros, organizada polo Colexio Oficial de Xoiaría

San Eloi, prateiro francés, de hai máis de 1.400 anos, era un home profundamente honesto, que chegou a traballar para a Corte gala.
Co motivo desta celebración, o Colexio Oficial de Xoiaría, Ourivaría, Prataría, Reloxaría e Xemoloxía de Galicia organiza este sábado 3 de decembro a súa Gala Anual de San Eloi, na cidade da Coruña.

Esta Gala, organizada en colaboración co Gremio Provincial de Xoieiros, Prateiros e Reloxeiros da Coruña, segue a tradición de celebrar o Patrón nunha cidade distinta cada ano, co fin de achegarse aos colexiados de toda Galicia.

Esta cita, ademais de conmemorar un día moi sinalado para o sector, constitúe un punto de encontro que permite aos profesionais da xoiaría, procedentes de toda a xeografía galega, compartir un día entrañable e estreitar os lazos de amizade que xa os unen. Tamén serve de marco para render homenaxe a diversas persoas que se distinguiron pola súa dedicación ou apoio á xoiaría.

Entregarase

-No apartado de non colexiados: A medalla do Colexio a D. Antonio Couceiro Méndez, pola súa inestimable colaboración coa xoiaría galega, na súa etapa de Conselleiro de Industria e Comercio.

- No apartado de colexiados: A segueta de ouro do Colexio a D. Juan Manuel Candame Areosa, pola súa traxectoria profesional, un dos mellores, se non o melor, profesional das últimas décadas, pola súa dedicación ao sector, ao que entregou moito tempo e esforzo como Presidente da Federación Galega de Xoieiros e hoxe como Presidente da Asocición Española.

Neste apartado distínguense tamén a catro profesionais por levar toda unha vida dedicados á xoiaría, aos que se lle fai entrega das Seguetas de Prata, do Colexio.
Aproveitarase a gala para facer a presentación da Campaña de Publicidade do Colexio para este Nadal de 2011, que se difundirá por televisións, radio e medios de transporte públicos.

Para achegarse ao público e dar máis visibilidade ao traballo dos seus colexiados, aproveitarase a celebración desta Gala do San Eloi, para abrir unha páxina nunha das redes sociais máis utilizadas polos consumidores: Facebook.