A Uned Senior de Xestoso celebra a clausura do curso académico 2011-12

O día 21 de xullo do 2012, a Uned Senior de Xestoso celebrou o acto
oficial de clausura do curso académico 2011/2012, no pavillón polideportivo
municipal do CPI "Virxe da Cela", no Xestal(Monfero). Presidido polo Sr.
Alcalde de Monfero, a Sra. Directora da UNED de A Coruña, o coordinador D.
Luís Angel Rodríguez Patiño, entre outras autoridades e representantes
municipais dos diferentes concellos que abarca a Uned Senior de Xestoso:
Monfero, Aranga, Xermade, Guitiriz e Paderne.

Foi un acto moi entrañable, iniciado coa intervención de D. Luís Angel
Rodríguez Patiño, agradecendo a participación e apoio das diferentes
autoridades e institucións, e tamén a dos alumnos e alumnas ("sen vós, non
se podería levar a cabo este proxecto"), afirmou. No mesmo senso, foi a
disertación do Sr. Alcalde de Monfero, da Sra. Directora da UNED e das
outras persoas que participaron na mesa.

Posteriormente, leuse un texto, moi interesante e emotivo, sobre o que
supón a existencia da Uned Senior de Xestoso na dinamización cultural e na
mellora da calidade de vida das persoas maiores desta zona. Tamén se puxo
de manifesto o agradecemento de todos nós, alumnos e alumnas, ao noso
coordinador, D. Luís Ángel Rodríguez Patiño, á UNED de A Coruña, a todos os profesores e profesoras que nos orientan e axudan, a todos os concellos que nos apoian e a todas as persoas que fan posible este marabilloso proxecto. Este texto foi escrito por Dona Mercedes Cachaza Platas, alumna da aula de Paderne, que non se atopaba presente, e foi lido por outra persoa no seu nome.

Finalmente, tivo lugar a entrega de diplomas a todos os alumnos e alumnas.
Logo, un xantar de fraternidade, alí, no mesmo polideportivo. Logo, as
persoas que asisten ás clases de música nas diferentes aulas, actuaron
conxuntamente, interpretando diferentes pezas e cancións aprendidas durante o curso.