Skip to main content

Noticias

  • O Premio Elías Valiña recoñece ás Asociacións de Amigos do Camiño de Ávila e de Hungría e outorga unha mención especial ao médico José Carro Otero
    Vén de resolverse a XXII edición do Premio Elías Valiña, o galardón co que distingue o labor revitalizador dos valores do Camiño de Santiago. Como se publica no Diario Oficial de Galicia, este ano recae de xeito conxunto nas Asociacións de Amigos del Camino de Santiago en Ávila e na de Hungría. Ademais, o xurado decidiu recoñecer a título póstumo ao médico e antropólogo compostelán José Carro Otero, falecido recentemente, cunha mención especial pola súa contribución á divulgación e investigación da Ruta Xacobea.
  • O Centro Dramático Galego asume a produción de dous novos espectáculos dirixidos por Cándido Pazó e Marta Pazos
    O Centro Dramático Galego asume a produción de dous novos espectáculos baixo a dirección de Cándido Pazó e de Marta Pazos nunha nova aposta pola dramaturxia galega contemporánea e polos clásicos. Na primeira estrea prevista, unha adaptación de A peste de Albert Camus, estará á fronte Cándido Pazó. A segunda, Ás 8 da tarde cando morren as nais, será dirixida por Marta Pazos a partir da dramaturxia de AveLina Pérez. En liña coas producións deste ano, tamén de adaptación dun clásico, con O charco de Ulises, e de dramaturxia galega contemporánea, con Terceiro acto e Serva me, servabo te.
  • Máis dun cento de expertos e preto de 70 empresas punteiras do sector dos vehículos non tripulados exporán e analizarán en Galicia as novas tecnoloxías e usos dos drons na sexta edición de Unvex
    Unvex, o maior evento de vehículos non tripulados que se celebra en España, dará cita aos principais expertos nacionais e internacionais e empresas do sector os días 7, 8 e 9 de xullo na Cidade da Cultura de Galicia en Santiago de Compostela, na Escola Naval de Marín e no Centro de Investigación Aeroportada de Rozas (CIAR) en Castro de Rei (Lugo). Unvex ten confirmadas preto de 70 empresas expositoras que amosarán as súas novidades tecnolóxicas nos máis de 2500 metros cadrados de exhibición, entre os que destacan compañías tractoras do sector aeroespacial así como pequenas e medianas empresas e operadoras.
  • A conciliación, o ocio responsable e a creación de emprego, piares da Campaña de Verán de Xuventude
    A directora xeral de Xuventude, Participación e Voluntariado, Cristina Pichel, compareceu a petición propia na comisión de Sanidade, Política Social e Emprego do Parlamento de Galicia. Na súa comparecencia sinalou que a presente campaña de verán permite incidir en tres aspectos moi beneficiosos como son: a conciliación, o ocio responsable e a creación de emprego no sector do tempo libre. Cifrou en 650 os contratos asociados a esta campaña durante o ano pasado e destacou que a Xunta de Galicia segue fortalecendo esta oferta como fixo o ano pasado, a pesar da crise sanitaria da covid-19. Neste sentido, lembrou que Galicia foi das poucas comunidades que mantivo estas actividades durante o verán do 2020 cun moi bo resultado, xa que non se rexistrou ningún caso positivo. Así mesmo, fixo balance da oferta da campaña deste ano, que ten como lema ‘O verán que mereces’, e no que se ofertarán un total de 7.800 prazas entre campamentos, campos de voluntariado, minicampamentos e intercambios con outras comunidades. Trátase de mil prazas máis que o pasado ano.
  • Os axentes galegos do software libre colaborarán coa Amtega no Plan de software libre 2021
    A Axencia para a Modernización Tecnolóxica de Galicia (Amtega) vén de publicar o Plan de Acción en Software Libre 2021, que recolle diferentes actuacións co obxectivo de fomentar e promover o uso e reutilización de software libre na administración pública, o impulso dunha oferta de solucións libres e de calidade para as nosas empresas, e incrementar o uso e coñecemento do software libre por parte da sociedade. Como xa vén sendo habitual, unha parte moi importante destas actuacións desenvolveranse en colaboración dos principais axentes do ecosistema de software libre galego. Así asináronse convenios coa Asociación Galega de Empresas de Software Libre (AGASOL); coas Asociacións Galegas de Usuarios de Software Libre (AGUSL); e co Consorcio para o desenvolvemento de aplicacións Informáticas de Xestión Universitaria de Galicia (CIXUG), integrado polas tres universidades galegas.
  • O Salón Teatro despide a temporada cos espectáculos 'O mozo da última fila', de Redrum, e 'As virxes salvaxes', de Teatro do Noroeste
    O Centro Dramático Galego (CDG) pecha esta fin de semana a temporada de exhibición no Salón Teatro de Santiago de Compostela cos espectáculos O mozo da última fila, de Redrum Teatro, e As virxes salvaxes, de Teatro do Noroeste. As representacións terán lugar o sábado 29 e o domingo 30 respectivamente. As entradas xa se poden adquirir a través de ataquilla.com e estarán tamén á venda nos despacho de billetes o mesmo día de cada sesión, desde dúas horas antes do seu comezo. Dirixida por Alex Sampaio a partir dunha dramaturxia de Juan Mayorga, O mozo da última fila é unha reflexión cargada de ironía sobre a necesidade de contar historias, a fascinación polas vidas alleas e a lexitimidade da creación artística.
  • Co gallo do Día das Letras Galegas, o Colectivo Egeria vén de publicar o libro 'AQUELA NENA DE SARRIA', sobre os anos sarriáns e lucenses de Xela Arias
    Esta obra forma parte do proxecto do mesmo nome, promovido polo Colectivo Egeria, co patrocinio da Xunta de Galicia, e a colaboración da Real Academia Galega e o Concello de Sarria. Este proxecto está composto por unha web, unha exposición itinerante que a finais deste mes terá visitado 42 cidades e poboacións de Galicia, e un catálogo que recolle os contidos da exposición.
  • 'Escenas do cambio' arranca o 20 de maio cun programa de 11 obras en catro días
    A sétima edición de Escenas do cambio −o festival de teatro, danza e arte en acción da Xunta de Galicia na Cidade da Cultura− arranca o vindeiro xoves, 20 de maio, concentrando nunha fin de semana longa (ata o domingo 23) un total de 11 propostas escénicas anovadoras, procedentes de cinco países: España, Portugal, Francia, O Reino Unido e O Xapón e para as que xa están as entradas á venda no web www.escenasdocambio.org. Estes catro días darán a posibilidade de coñecer obras que nunca antes se presentaran en Galicia, en total 10 das 11 propostas.
  • A Federación Galega de Bandas de Música anuncia 94 concertos no Xacobeo 21-22
    O programa 'O país das bandas' levará a cabo preto dun centenar de concertos entre xuño e setembro. Están chamadas a participar todas as bandas galegas, tanto federadas como non federadas, que suman preto de 5.000 instrumentistas, con recitais que se distribuirán por todo o territorio galego. Un terzo do programa será con obras de autoría ou temática galegas. O calendario de concertos que deseñará esta Federación complementará e enriquecerá a oferta cultural do Xacobeo 21-22, sumándose aos actuais circuítos e redes que xa están en marcha ou que se activarán proximamente por parte da Consellería de Cultura, Educación e Universidade: a Rede Galega de Teatros e Auditorios, a Rede Galega de Música ao Vivo, Cultura no Camiño ou FEST Galicia, entre outros.
  • 'A metamorfose do comunismo na China', nova obra de Xulio Ríos
    Xulio Ríos, director do Observatorio de la Política China, vén de publicar na editorial Kalandraka un novo volume relativo ao xigante asiático con motivo do centenario da fundación do Partido Comunista (PCCh). Ao longo das súas case 500 páxinas, abórdanse os diferentes períodos históricos que marcan a evolución do comunismo na China, xirando arredor das seguintes oito teses centrais: Primeira, os cen anos do PCCh (1921-2021) trazan unha liña de clara continuidade que abunda na transcendencia do ideal nacional como factor mobilizador principal na súa constitución e desenvolvemento, resolvendo moi inicialmente a súa relación paralela e controvertida co internacionalismo de matriz soviética.